އޮފީސް ފޮޅާ ސާފުކުރުމުގެ މަސައްކަތަކީ ވެމްކޯއަށް ކުރެވިދާނެ ކަމެއް ކަމަށާއި އެކަން ފަށަން ތައްޔާރު ކަމަށް ވެމްކޯއިން ހާމަކޮށްފިއެވެ.
ދައުލަތުގެ މީޑިއާ ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން ވެމްކޯގެ ޑެޕިއުޓީ މެނޭޖިން ޑައިރެކްޓަ އަހުމަދު އަބްދުލް ކަރީމް (ރުކުމާ) ވިދާޅުވީ ސީދާ ދިވެހިން ގޮވައިގެން އެކަން ވެމްކޯއަށް ކުރެވިދާނެ ކަމަށެވެ. މިހާރުވެސް ގިނަ އަދަދެއްގެ ބިދޭސީން ހަރަކާތްތެރިވާ ފޮޅާ ސާފުކުރުމުގެ މަސައްކަތް ކުރުމަށް ވެމްކޯގައި ގާބިލު ޓީމެއްވެސް އޮތްކަން ފާހަގަކޮށް ރުކުމާ ވިދާޅުވީ ވެމްކޯއަށް އެކަން ނުވާންވީ ސަބަބެއް ނެތް ކަމަށެވެ.
ރުކުމާގެ އިންޓަވިއުއަށް ބައެއް ފަރާތްތަކުން އަންނަނީ ފާޑު ކިޔަމުންނެވެ. މި ގޮތުން ސަރުކާރުން ކުދި ވިޔަފާރިތަކަށް ނުވަދެ، ކުރަން ޖެހޭނެ ކަމަކީ އެފަދަ ފަރާތްތަކަށް ފަސޭހަކޮށްދިނުން ކަމަށާއި ވެމްކޯއިން މިހާރުވެސް ކުރަމުންދާ ކުނި އުކާލުމުގެ މަސައްކަތްތައް ހަރުދަނާކޮށް ރަނގަޅަށް ކުރުން މާމުހިއްމު ކަމެއް ކަމަށް ފާހަގަކޮށްފައިވެއެވެ. ސޯސަލް މީޑިއާގައި އާއްމު ފަރާތަކުން ބުނެފައިވަނި ’އަންނައުނު ދޮވެ އިސްތިރިކުރުމާއި ތެލިތަށި ދޮވުމަށްވެސް ވެމްކޯއިން ވަންނަންވީ ކަމަށާއި އެހެންވިޔަސް ފުރަތަމަ ހަވާލުވެފައިވާ މަސައްކަތްތައް ރަނގަޅަށް ކުރަންވީ ކަމަށެވެ. މިގޮތުން ފުނިފުންޏަށް ކުނި ޖަމާކުރީމާ ނޫނީ އުކާނުލެވޭ ބަޔަކު އެހެން ކަމަކަކަށް ވަނުން ބަލައި ނުގަނެވޭ ކަމަށް އެފަރާތްތަކުން ދެކެއެވެ.
ދިވެހިން ގޮވައިގެން އޮފީސްތައް ފޮޅާސާފުކުރުމުގެ މަސައްކަތަށް ވެމްކޯއިން ތައްޔާރުވާއިރު މިހާރުވެސް ގިނަ އަދަދެއްގެ ބިދޭސީން ވެމްކޯގައި އަންނަނީ މަސައްކަތް ކުރަމުންނެވެ.
