ސްޓެލްކޯގެ ކޭބަލްތަކެއް ވަގަށް ނެގި މައްސަލައިގައި ހޯދަމުން އައި މީހާ ހައްޔަރުކޮށް އޭނާގެ ބަންދަށް 15 ދުވަސް ޖަހައިފިއެވެ.
މަޖީދިއްޔާ ސްކޫލު ސަރަހައްދުގައި ހުންނަ ސްޓެލްކޯގެ ސަބްސްޓޭޝަންގެ ކޭބަލްތަކެއް ބުރިކޮށް އެތަކެތި ވަގަށް ނެގީ މި މަހުގެ ދެ ވަނަ ދުވަހުއެވެ.
އެ ދުވަހު ސްޓެލްކޯގެ ޓްރާންސްފޯމަރެއްގެ ކޭބަލް ބުރިކޮށްލައިގެން ވަގަށް ގެންދިއުމާ ގުޅިގެން މަޖީދިއްޔާ ސްކޫލު ހިމެނޭހެން ހެންވޭރުގެ ބައެއް މަގުތަކުންނާއި ގެތަކުން ކަރަންޓު ކެނޑުނެވެ. އެއީ ހެންވޭރު އަބަދަށްފެހި މަގާއި މެދުޒިޔާތަރްމަގާއި ކަޅުހުރާމަގާއި ކަރަންކާ މަގުގެ އިތުރުން ބައެއް ގެތަކުންނެވެ.
ފުލުހުން ވަނީ އެ މައްސަލައިގެ ތުހުމަތުކުރެވޭ 32 އަހަރުގެ ދިވެހި ފިރިހެނެއް ރޭ ހައްޔަރު ކޮށްފައެވެ.
ފުލުހުން މިއަދު ބުނީ އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހުގެ މުއްދަތަށް ބަންދު ކުރުމަށް ކޯޓުން އަމުރުކޮށްފައިވާ ކަމަށެވެ.
ސްޓެލްކޯ ގެ މެނޭޖިން ޑިރެކްޓަރ ފަހުމީ ވިދާޅުވީ މިއީ މިކަން ކުރާ ފަރާތްތަކަށް އިންތިހާއަށް ނުރައްކާއޮތް ކަމަކަށް ވާއިރު، އަދި މިކަމުގެ ސަބަބުން ސްޓެލްކޯއަށް ލިބޭ ގެއްލުމުގެ އިތުރުން އާންމު ރައްޔިތުން ކަރަންޓުގެ ހިދުމަތުން މަހުރޫމްކުރެވި ކަސްޓަމަރުންނަށް އެތައް ތަކުލީފެއް ލިބެމުންދާ ކަމަށެވެ. އެހެންކަމުން ކޭބަލު ވަގަށް ނަގާ ފަރާތްތަކާއި އަދި މިކަން ކުރާ ފަރާތްތަކަށް ހިތްވަރަކަށް ވާގޮތަށް، ވަގަށް ނަގާފައިވާ މިފަދަ ތަކެތި ގަންނަ ފަރާތްތައް ހޯދައި ގާނޫނީ ގޮތުން އެފަދަ ފަރާތްތަކާއި މެދު އަޅަންޖެހޭ އެންމެހާ ފިޔަވަޅުތައް އެޅުމަށް ކަމާ ބެހޭ ފަރާތްތަކަށް އިލްތިމާސްކުރާ ކަމަށެވެ.
