ސަރުކާރުން މާލޭގައި އެންމެ ފަހުން ހުޅުވި ސްކޫލު އިއްޒުއްދީން ސްކޫލު ހުއްޓާލަން އުޅޭ ކަމުގެ ކަންބޮޑުވުމާއި އެކު ބެލެނިވެރިން ހިތްހަމަ ނުޖެހުން ފާޅުކޮށްފިއެވެ.
ކުރީގެ ރައީސް އިބްރާހިމް މުހައްމަދު ސޯލިހު 12 ޖެނުއަރީ 2020 ގައި ހުޅުވައިދެއްވި ސްކޫލުގައި ކިޔަވައިދިނުން ހުއްޓާލަން އުޅޭ ސަބަބަކީ އިމާރާތުގައި ރެނދެއް އިނުމުން ކިޔަވައިދިނުން ރައްކާތެރިނޫން ކަމަށް ބުނެއެވެ.
މިއަދު އޮތް ބެެލެނިވެރިންގެ ބައްދަލުވުމެއްގައި އެ ސްކޫލުގެ ކިޔެވުން ހުއްޓާލައި ދަރިވަރުންނާއި ޓީޗަރުންވެސް ’އެހެން ގޮތެއް ހޯދުމަށް‘ އެޑިއުކޭޝަން މިނިސްޓްރީން އަންގާފައިވާ ކަމަށްވެއެވެ.
އެޑިއުކޭޝަން މިނިސްޓްރީން ބައެއް މީޑިއާތަކަށް މައުލޫމާތު ދެމުން ބުނެފައިވަނީ އިއްޒުއްދީން ސްކޫލު އިމާރަތުގައި ރެނދެއް ހުރުމުގެ ސަބަބުން އެތަނުގެ އެސެސްމަންޓެއް ހަދަމުންދާ ކަމަށާއި، އެއަށް ފަހު އެ ސްކޫލާއި މެދު ވަކި ގޮތެއް ނިންމާނެ ކަމަށެވެ. މިއަދުގެ ބައްދަލުވުމުގައި ބައިވެރިވި އެ ސްކޫލުގެ ބެލެނިވެރިއެއް ބުނީ އެ އިމާރާތް ބާވެ، ރެނދު އެޅުމުގެ މާބޮޑު ވާހަކައެއް މިއަދުގެ ބައްދަލުވުމުގައި ނުދެކެވޭ ކަމަށާއި މައިގަނޑު ގޮތެއްގައި ދެކެވުނީ އެހެން ސްކޫލުތަކަށްޓީޗަރުންނާއި ކުދިން ބަހާލުމުގެ ވާހަކަ ކަމަށެެވެ.
ދިރާސީ އާ އަހަރު ފެށުނު ފަހުން ކުއްލިއަކަށް މިފަދަ ނިންމުމެއް ނިންމުމުން ބެލެނިވެރިންގެ ކަންބޮޑުވުން ހުރިއިރު، ރެނދު އަޅާފައިވާ އިމާރާތް ބޭނުން ނުކޮށްވެސް އެ ސްކޫލުގައި ކިޔަވައި ދެވިދާނެ ކަމަށް ބައެއް ބެލެނިވެރިން ދެކެއެވެ. އެ ސްކޫލުގެ އެސެސްމެންޓު ހަދައި ނިމޭނެ ކަމަށް އެޑިއުކޭޝަނުން ލަފާކުރަނީ އީދު ބަންދަަށް ފަހުގައެވެ. އޭގެ ފަހުން ޓީޗަރުންނާއި ދަރިވަރުން އަމަލު ކުރަން ޖެހޭ ގޮތް އެޑިއުކޭޝަނުން ރަސްމީކޮށް އަންގާނެ ކަމަށް އެޑިއުކޭޝަން މިނިސްޓްރީގެ އޮފިޝަލަކު ވިދާޅުވިއެވެ.
މިއަދުގެ ބައްދަލުވުމުގައި ބައިވެރިވި އެހެން ބެލެނިވެރިއެއް ބުނީ ސްކޫލާއި އެޑިއުކޭޝަން މިނިސްޓްރީގެ ވާހަކަތައް ހުރީ ވީހާވެސް އަވަހަށް ޓީޗަރުންނާއި ދަރިވަރުން އެހެން ސްކޫލަކަށް ބަދަލުކޮށް، އެ ސްކޫލު އުވާލުން ނުވަތަ ދާއިމީކޮށް ހުއްޓާލުމެވެ. ވަގުތީ އިމާރަތެއްގެ ވާހަކަވެސް ނުދެކެވޭއިރު ބެލެނިވެރިންގެ ކަންބޮޑުވުމަކީ އެހެން ސްކޫލަކަަށް ކުދިން ބަދަލުކޮށް ކިޔެވުމަށް އަސަރުކުރާނެތީއެވެ. މިއަދުގެ ބައްދަލުވުމުގައި ބެެލެނިވެރިން އެދުނީ މި ސްކޫލުގެ ބެޖާއި ލޯގޯ އަދި ނަން ބަދަލު ނުވާނެ ގޮތަކަށް ވަކި އިމާރާތަކަށް ބަދަލުވުމަށެވެ. އަދި ވީހާވެސް އަވަހަކަށް އިމާރާތް މަރާމާތުކޮށްގެންވިޔަސް ކިޔަވާ ދިނުން ކުރިއަށް ގެންދިއުމަށެވެ.
އާއްމުކޮށް ސްކޫލުތައް ބާވެ ނުވަތަ ކިޔަވައިދޭން އެކަށީގެންނުވާ ކަމަށް ޝަކުވާ ކުރަނީ ބެލެނިވެރިން ކަމަށްވިޔަސް މި ސްކޫލުގެ ބެލެނިވެރިން މިހާތަނަށް މި މައްސަލަ ފާހަގަކޮށްފައި ނުވެއެވެ. މި ސްކޫލަކީ ސަރުކާރު ސްކޫލުތަކުގެ ތެރެއިން އެންމެ ފުރަތަމަ އެއް ދަންފަޅިއަށް ކިޔަވާދިނުމަށް ހަމަޖެއްސި ސްކޫލެވެ. ކުދިންގެ ކިޔެވުމާއި ނަތިޖާވެސް އިންތިހާއަށް ރަނގަޅު، މި ސްކޫލަށް ކުދިން ވެއްދުމަށް ދިގު ކިއު އެއް އޮވެއެވެ.
