މާލެއިން ފުރައިގެން 16 ޕަސިންޖަރުންނާ އެކު ތ. އަތޮޅަށް ދަތުރުކުރި “އެމްއާރުސްޕީޑް“ ނަމަކަށް ކިޔާ ލޯންޗެއް، ފަޅައިގެންގޮސް ދިޔަވަމުން ދަނިކޮށް ސަލާމަތްކޮށްފައިވާ ކަމުގައި އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފުން ވިދާޅުވީ، ހާދިސާގެ ރިޕޯޓް ލިބުނީ މިއަދު ހަވީރު ކަމަށާއި، ލޯންޗު ފަޅައިގެން ދިޔައީ ކޮޅުމަޑުލު ބުރުންނާއި 4 ނޯޓިކަލްމޭލު ބޭރުން ދަތުރުކުރަމުން ދަނިކޮށް ކަމަށެވެ.
އެމްއެންޑީއެފުން މައުލޫމާތުދޭ ގޮތުގައި އެ ހާދިސާގެ މައުލޫމާތު ލިބުމާއިއެކު، އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑް ހާބަރ ކްރާފްޓް ވަނީ ދ. ކުޑަހުވަދޫއިން ފުރައިގެން އެސަރަހައްދަށް ދަތުރުކޮށް ލޯންޗުގައި ޕަންޕް ޖައްސައިގެން ދިޔަގަނޑު ކޮންޓްރޯލްކޮށް ރައްކާތެރިކަމާއެކު ލޯންޗު ތ. ބުރުނީ ފަޅަށް ވައްދައިދީފައި ކަމަށެވެ.
އަދި ހާދިސާ ހިނގި އިރު ލޯންޗުގައި ތިބި އެންމެގެ ހާލުވެސް ރަނގަޅުކަމުގައި އެމްއެންޑީއެފުން މައުލޫމާތދެއެވެ.
މިދުވަސްވަރަކީ ވިއްސާރަ އަދި ކަނޑުތައް ގަދަ ދުވަސްވަރަކަށްވާތީ ކަނޑު ދަތުރުފަތުރުކުރައްވާ ފަރާތްތަކުން މޫސުމަށް ސަމާލުވުމަށް މޫސުމާއި ބެހޭ އިދާރާއިން ދަނީ އިލްތިމާސްކުރަމުންނެވެ.
ރޭގެ ވަގުތެއްގައިވެސް ’ސައުތު ލައިން ބޯޓު‘ ގއ.ނިލަންދޫ ނެރަށް އަރައި ގެއްލުންތަކެއް ވެފައިވެއެވެ. މި ބޯޓަށްވެސް ވަނީ އެމްއެންޑީއެފުން އެހީތެރިކަން ފޯރުކޮށްދީފައެވެ.
