ގއ. ނިލަންދޫ ނެރުމައްޗަށް ބޯޓެއް އުރުމުން އެމްއެންޑީއެފް އިން އެހީތެރިކަން ފޯރުކޮށްދީފިއެވެ.
އެމްއެންޑީއެފް އިން މައުލޫމާތުދޭ ގޮތުގައި އެރަށު ނެރުމައްޗަށް އުރިފައިވަނީ އެރަށަށް ވަންނަން ދަތުރުކުރަމުން ދިޔަ ”ސައުތު ލައިން“ ނަމަކަށްކިޔާ ބޯޓެއް ކަމަށެވެ.
11 ފަޅުވެރިންނާއެކު ދަތުރުކުރަމުންދިޔަ މި ބޯޓު، ނެރުމައްޗަށް އުރުނު ކަމުގެ މަޢުލޫމާތު ރޭ (31 ޑިސެންބަރު) 8:36 ހާއިރު އެމްއެންޑީއެފް ސަަދަން އޭރިއާ ކޮމާންޑް، ކޯސްޓްގާޑް ފޯތު ސްކޮޑްރަން ލިބުމާއެކު، ސިފައިން ވަނީ އެހީތެރިކަން ފޯރުކޮށްދޭން ފަށާފައި ކަމަށް އެމްއެންޑީއެފުން މައުލޫމާތު ދެއެވެ.
ސައުތު ލައިން ބޯޓު ނެރު މައްޗަށް އުރި، ބޯޓުގެ ކުރީކޮޅު ބަނޑުދަށް ފަރާތުން ފަޅައިގެންގޮސް ދިޔަވަމުންދާތީ ޕަންޕު ޖައްސައިގެން ފެން ހިއްކައި، ފަޅައިގެންގޮސްފައި އޮތް ތަން ބެއްދުމުގައި ވެސް ކޯސްޓްގާޑުގެ ޑައިވަރުން އެހީތެރިކަން ފޯރުކޮށްދީފައިވައިވެއެވެ.
ބޯޓުގެ ފަޅައިގެންގޮސްފައިވާ ތަން ބައްދައި، ރޭ މެންދަމު 3:19 ހާއިރު އެ ބޯޓު ވަނީ ވެރިފަރާތުން ގެނައި އިތުރު ދޯންޏެއްގެ އެހީގައި ކަފުޖަހައިގެން ގއ. ނިލަންދޫ ބަނދަރަށް ވަނީ ވައްދާފައެވެ.
މި ހާދިސާގައި ބޯޓުން ދަތުރުކުރި އެއްވެސް މީހަކަށް އަނިޔާއެއް ލިބުނުކަމުގެ މަޢުލޫމާތެއް ލިބިފައެއް ނުވާ ކަމަށާއި ބޯޓު ނެރުމައްޗަށް އުރުނު އިރު ބޯޓުގައި އެއްވެސް މުދަލެއް ވެސް ނެތް ކަމަށްވެސް އެމްއެންޑީއެފުން މައުލޫމާތު ދެއެވެ.
މި ދުވަސްވަރަކީ ވިއްސާރަ ކަނޑުގަދަ ދުވަސްވަރެއްކަމުން ކަނޑުދަތުރުކުރާ އުޅަނދު ފަހަރުން މޫސުމަށް ބަލައިގެން ދަތުރު ކުރުމަށް އެމްއެންޑީއެފުން އިލްތިމާސް ކުރެއެވެ.
